Ta un berguensa grandi pero na mes momento hopi tristo, cu interes di centenares di muchanan di Colegio Santa Teresita na San Nicolas, ainda no a ser atendi pa caso un decada caba. Ta bin acerca e hecho cu den un reunion publico di Parlamento na 2025, un mocion a wordo entrega pa Parlamentario di fraccion di AVP, Otami Thomasia, cual mocion a conta cu hopi sosten di otro miembronan pa gobierno regla e problema di speelplaats di Colegio Santa Teresita. Awor no ta un secreto cu e gobierno actual “ainda” no por a drecha ningun caretera cu pa algun aña caba ta gritando pa un capa nobo pero e falta di iniciativa aki ta duna indicacion cu Minister di Infrastructura Rene Baba Herde y su gobierno, no tin control di un of otro departamento di gobierno, cu ta strobando cantidad di proyecto cu ta rekeri asfalt. Tin miyones riba presupuesto pa asfalta careteranan y pa otro proyectonan y entre nan tin e ‘speelplaats’ di e scol di San Nicolas caminda ainda no tin splicacion hustifica di con DOW no a atende su mes c’un asunto asina importante pa e scol di San Nicolas. E pregunta cardinal riba e materia aki ta lo siguiente: “UNDA E PLACA DI ASFALT A KEDA” – “UNDA E ASFALT A KEDA.”