Popujt bëhen kombe të fortë kur ata mençurohen dhe janë të guximshëm e të gatshëm për të përballuar e sfiduar vështirësitë, padrejtësitë, intrigat dhe jo të binden, t’iu nënshtrohen dhe të pajtohen me të keqen. Kushtetuta e mirë, qeverisja e mirë dhe drejtësia e zbatuar mirë formojnë shtetin e mirë ligjor dhe e bëjnë kombin patriot, të edukuar e të mirë. Njeriu, populli, kombi dhe të dy shtetet tona janë realitete që vazhdimisht kërkojnë rritje të edukimit, profesionalizmit, progresit, mirëqenies e konsolidimit për të lartësuar nderin, përkatësinë, lavdinë e krenarinë kombëtare. Në politikën 20-vjeçare të tranzicionit në Shqipëri kemi dëgjuar prej saj edhe fjalë bombastike për patriotizmin dhe kombin, që nuk janë gjë tjetër dhe që nuk kanë qëllim tjetër veçse si tymnaja për të mbuluar dështimet dhe egoizmin tinëzar për të marrë e rrëmbyer pushtet. Këto interesa grupale kontrollojnë, drejtojnë dhe kufizojnë qeverisjen, ligjin dhe drejtësinë dhe guxojnë e bëjnë padrejtësi; janë grupe që kontrollojnë veprimtarinë ekonomike, që bëjnë përzgjedhjen e klientelizmit favorizues nga njëra anë dhe presionin, kërcënimin e gjobat për mediat, individët dhe bizneset që nuk financojnë e nuk lobojnë për ta.