Consulado di Colombia cu su sede den capital di Aruba, ta duna un resumen pa su ciudadanonan residencia aki na Aruba. E ta cuminsa pa informa cu autoridadnan Colombiano ta sigui cu proceso di evaluacion di daño y atencion pa e casonan di emergencia. Esaki ta den cuadro di e teremoto di 7.4 y su replicanan cu a tuma luga riba dialuna, 10 di augustus, y cu a afecta specialmente departamentonan di Valle del Cauca, Chocó, Risaralda, Caldas y Antioquia. Autoridadnan Colombiano ta sigui evalua e necesidadnan a causa di e emergencia y, si ta necesario, lo informa di esaki via di e canalnan oficial. Consulado ta expresa su sincero gradicimento na gobierno y na pueblo di Aruba, Cuerpo Consular, e institucionnan,, organisacionnan y ciudadanonan cu a manifesta nan solidaridad y afecto pa cu Colombia y cu e famianan afecta.