Presidenti i Ukrainës, Volodymyr Zelensky, ka deklaruar se i ka kërkuar presidentit amerikan Donald Trump një paketë emergjente me 300 raketa Patriot për të përballuar sulmet ruse ndaj infrastrukturës energjetike të vendit gjatë dimrit. Pas takimit me Trump, Zelensky zhvilloi bisedime edhe me përfaqësues të kompanive amerikane Lockheed Martin dhe Raytheon, prodhues të raketave Patriot. Megjithatë, ai pranoi se edhe nëse Ukraina siguron licencën e prodhimit, do të duhen nga një deri në pesë vjet për të arritur prodhimin në shkallë të gjerë. Nga ana e tij, presidenti Trump premtoi se do të përpiqet të ndihmojë Kievin, por nënvizoi se SHBA e ka të vështirë të furnizojë Ukrainën me një numër kaq të madh raketash, për shkak të angazhimeve të tjera ushtarake, përfshirë konfliktin me Iranin. Zelensky bëri të ditur gjithashtu se të dërguarit amerikanë Steve Witkoff dhe Jared Kushner mund të vizitojnë Kievin brenda dy javëve të ardhshme.