Den marco di e Common Good Conference cu ta tuma luga e siman aki, diferente fundacion riba Aruba ta comparti con nan ta pone e concepto di bon comun na practica. Un di nan ta Foundation for the Development and Psychosocial Empowerment, un fundacion cu ta enfoca riba empoderamento social, bienestar mental y consciencia ambiental. Segun e directora di e fundacion, Janine, nan ta traha cu un modelo innovado pa medio di nan Programa Natura, un programa hibrido cu ta conecta iniciativanan social cu sector priva. “Ta un manera di haci cu nos programa y nos fundacion ta keda autosostenibel, mientras nos ta hiba common good bek na comunidad”, ta locual Janine a bisa durante su entrevista. Pa medio di e Common Good Conference y Expo, e fundacion ta spera inspira otro organisacion pa mira cu ta posibel crea modelo nobo cu ta sostenibel y cu ta sirbi sociedad den su totalidad.